|
Ka pashtinatau kie ka mishkushutshetau
Ka kupatau ka uapishitau ute Pekuakamiulnuatsh utassiuatsh ekuan ka tshitshipalitsh e kashtihekanitsh tshekat kassinu tshitilniunnu. Ekuan ne kassinu mamu ka papilitsh miam ka assitshanuatsh mahk ka pashtinanuatsh mahk ka petatau ka uapukuiesh utaimiheun e ui kutsh mishkutshipalitatau tshitaimiheunnu, kassinu ne tshi mishta mishkutshipalu nite tshitilniunnatsh. Ne e alimutakanitsh nishtan ka nikanishtetsh ilniun, apu ne ui issishuanuatsh ekuan ne alu meluatsh, mukune ui uauihtakanu tan ne ka eshi uauitshiuetsh tahtipan ka nishikau ilniunna.
Nite alu ka uhtsh kashtuhukuihk, ekute nite ka tshishkutamatshanuatsh. Ka tshimitakanitsh tshishkutamatsheutshuapa mahk nite ka kanauelimakanitau auassitsh tshi mishta kashtuhukuatsh mishue ilnuatsh usham e tshimitakanilitsh tshishkutamatsheunnilu mahk tipan e ashtakanilitsh ilnu aihtunnilu nelu miam ilnuatsh peikuitsh ka eshilniutau . Uipatsh e pateshtahtapuneshitau (5 ans) auassitsh shash utinakanipantsh tshetshi alakanitau nite ka kanauelimakanitau auassitsh eka mahk uhtsh tapuetuakanitau tshetshi aimitau utaimunnuau.
  | 
