Ushiki

Mishta ishpitelimepantsh nelu ushiki Pekuakamiulnuatsh. Mushuian mahk atikuian apatshepantsh e tutakau u matshinishimuau  mahk tshekualu kie etapatshetakan.

Katshi nipahakan ne mishtaueshish akut nite  kassinu tshishatsh e pukunakan.  Akua tutuakanu e pukunakan.  Katshi tshishakant  ekue milu kashkashkuhakanit tshetshi eka nass upiuaut ne ushiki. Ueshkatsh Pekuakamiulnuatsh nelu apashitapantsh ashiniu muhkumanilu e mishta tshinalitsh tshetshi kassinu milu pishkuhatau nelu ushiki.

Kueshte nite ka uiashut ne ushiki, kassinu milu kashkashkihekanilipan uiashim nite eshku ka takunilitsh mahk kie uilan tshetshi milushit ne ushiki. Katshi ueueshakant ekue shitshipatakant mishtukuatsh tshetshi pashit ne ushiki.  Katshi matuhakant kie katshi kakashkuhakant mahk ekuan Pekuakamilnuatsh piputenepantsh alu tshetshi lussit kie alu tshetshi tshishpitshit ne ushiki.