Ni tshissituten eshk ka auassiuian, mishtishpitelitakunupan aimun nite nilan Ilnuatsh. Ekuan ne apatshitakanipan e aimahitunanuatsh ashitsh kutakatsh ilnuatsh.
Ni tshissituten miam utakushitsh ne, ni mushum kie nuhkum tahtatakussu e tshitapulitishupantsh miam e apita tipishkalitsh ekue natapishtuatau uashka ishkuteu kutaka tshishelnu nite ka manikashilitsh pessish. Nipishapulu manikueutsh kie apishish mitshutsh. Tshimut aimutsh tshetshi eka peikuhatau auassa ka nipalitsh, mihtshetuau ni uapamatitsh kie ni pehtuatitsh. Muku nuhtshimitsh ne tashep aihtunanipan.
Nelu eshi uauiepitau nitshe tshishelnuatsh alimumepantsh utanashkutapan mushumuau, u natuhussiuau mahk e tshishulakantshetau, katshi tutakau tshekualu mahk eshi pukutatau. Ueshkatsh tipatshimunnilu alimutamuatsh kie Atilukannilu ka itatshimunanunilitsh. Ne atilukan ka ashu tipatshimunanuatsh e uauihtetsh ilniun kie e uapataliuetau tan miam katshi aiaihtunanuatsh, ki auen mahk tshekuan ne. Apu nita uhtsh untshissitataman, tashep nite nishtukuantsh takuan kie peikuan nitshe kie uiluau tshishelnuatsh ka kakuetshimakanitau nelu.
Ushkatsh nitshe tshishelnuatsh....tshi uihtamuatsh eka nutam tshe tshissitatukau nelu atilukannilu usham milekash tshi punatilutsheutsh. Muku tshisselitamupantsh e takunilitsh tshetshi milu kanauelitakau nelu ka eshi nikatamuakanitau ilnu uelutshiunnilu ekue uauihtakau. Kassinu ne atilukan alimumakanuatsh auentshe kie eshi mahtaupalitsh kie mishkatelitakunilitsh.
Ne uilakanu "Manitou" mishue tshekuan e miluatsh peikuan kie eka ka miluatsh e pashitshishkakut ilnu. Pahpeikussutsh nisthe ka alimumakanitau kie tanite miam e tatau. Nitshe manitutsh nite ka tatau nipitsh, mishtukussitsh, e tahteuetakanitsh, pleshishitsh, aueshishitsh, e lutitsh, atshikushitsh kie eshku teutsh kutakatsh....kassinu nitshe tapishkuatsh ishpish shutshiutsh. Ne alu ka uhtsh ishpitelitakushit manitu, ekuan ne Tshishe Manitou kie ne ka manitushit nituapamukupan tshiash ilnu shaputueshkuatau auelu ka ui matshitutakutau kie peikuan e matshipalitau. (Noël Siméon, 1997, p. 65-66.)
Ne ka eishashu uauihtamatshanuatsh aihtun, eshku iapitsh tshi tutenanu tshetshi milu tshissitutamuhk ne eshi tipatshimushtakuihk. Apitelitakuan tshetshi uauihtakanitsh ne atilukan auentshe e alimumakanitau katshi aihtutau makie tshilanu kie tshipa uapatetanu nite taukupan ueshkatsh uhtanatsh. Kassinu milu nashekanu ne tipatshimun e ashu pashtinekanitsh; muku tshipatshi takuannilu kutak auen aitsh tshetshi itatshimut nelu; nelu alimumeutsh man aueshisha e nitau natukushilitsh e atilutshetau, kie auelu e uihtsh uieshtshelitsh mahk tan katshi aihtunanunilitsh eku kassinu ne milu kanauelitakanu miam tshishkutamatsheun.Pekuakamiulnuatsh tshissitutamuatsh nuhtshimitsh katshi tatau ueshkatsh. Alem tshisselitamuatsh tipatshimunnilu ka eshi nikatamakutau utanashkutapan mushummuau. Shash mihtshetu tshishe mitashu mitelneu pipun eshpish ashu tipatshimushtuakanitau nelu auassitsh. Tashep tshi mishta milu tipatshimunanun ne atilukan kie apu nite uhtsh aitsh ituekitakanitsh. Ne atilukan, tshiash tipatshimun ne kie tshishelnu nelu milakanu tshetshi tipatshimut. Ne eshi uauihtakanitsh ekuan ne petma nishtam eshi nukutakanitsh eshi tipatshimunanuatsh. Ne ka tipatshimut tshisselitan uil. Takuan nanukutin passe atilukan aitsh apishish e itstahimunanuatsh. Kassinu nite uhtshipalu ne uelutshiun ne ka eshi uauihtamakuihk. Nanukutin ne ka tipatshimut tshipatshi tshissitutam memen nelu tipatshimunnilu kutak auen katshi untshissit. Alu miluau e tipatshimunanuatsh ne makatsh tshetshi aimitakanitsh mashinaikanitsh.
Tshetshi mishta miluatakanitsh ne tipatshimun kie atilukan, takuan tshetshi milu nantutakanitsh kassinu kie nelu eteuekashit ne ka tipatshimut miam pleshish e nikamut, kie e pehtuakant utakakan kie kutaka tshekuan. Tshi mishta tshishkutamakunu ne atilukan kie tshiash tipatshimun. Ne uetsh tutakanitsh, tshetshi ashu pashtinekanitsh ilnu aihtun, tshetshi uapataliuanuatsh tshekuan ne uelutshiun mahk tshetshi aimituashinanuatsh.
