|
Mashteuiatsh (Pointe-Bleue)
1856 ka itshishtesh pipun Pekuakamiulnuatsh mishkutunimuatsh ka nishinilitsh assilu ka milakanitau mishkuatsh muk peik assilu 23 040 eshpishalitsh miam nite eshi tapihikanilitsh Ouiatchouan ka ishinikatelitsh. Katshi peiku mitashu mitelneu pipun nisht nite eshi tipatshimunanuatsh tshi petsh tshimitautsh tan etapatshitalitsh ilnu ute Pointe-Bleue: Ataueutshuap Baie d'Hudson ute tshi petsh atititau ut tatauitshuapam-ka tshipihekaniatsh nete ataueutshuap Metabetchouan; ka uapukuiesh tshi atussemuatsh tshetshi petsh atititakanilitsh mishkumitsh Pekuakamitsh shakahikan aimiheutshupissa nete ka tshimitelitsh Metabetchouan luash ute Pointe-Bleue kie tshishe utshimau tshi tshimileu ute napeu tshetshi tukuhamuat ilnu ute ilnussitsh.
At peikuan katshi tshimitakanitsh ilnussi ute kie e ishinakuatsh tashep ute tshetshi taik ekute ute ilnuatsh nikauipantsh man nuhtshimitsh e uhtetau. Apatshitakanipan peikuan ilnu aihtun ute muk alu nite nuhtshimiussitsh milu apatshitakanipan ne tshiash ilnu utaihtun.
Nite alu katshi uhtsh mishta mitelitakuatsh e takuhimatuhk tshishe utshimau, ekut nite tshishkutamatheunitsh. Nitshe ka uapukuieshitsh ka tshimitatau tshishkutamatsheutshuapa kie nite ka kanauelimakanilitsh auassa. Tshi mishtunatelitamihikuatsh nelu kassinu mishue ilnuatsh miam e naushenekanilitsh tan tshe eshi tshishkutamuakanilitsh utuassimuau nass kie eka uhtsh apitelitakanilitsh tan uiluau ka eshilniutau miam nelu utilnu aihtunnuau Pekuakamiulnuatsh. Uipatsh e patesh titapuneshit auass utinakanipan tshetshi nakitat u tshiluemakan tshetshi kushpilitsh u natuhussiuatsh e tikuatshinilish luash e shikunilitsh. Kie aputsh tapuehtuakanitau tshetshi aimitau uiluau utaimunnuau nite ka kanauelimakanitau.
Milekash ume tshi ishinikatekanu ilnussi Pointe-Bleue, apu ueshkatsh ne ka mishkutunekanitsh tshetshi ishinikatakanitsh Mashteuiatsh utenu. Ne uetsh ishinikatakanitsh e nehluanuatsh Mashteuiatsh usham ekut nite natshishkatupantsh ueshkatsh ilnuatsh. Muk aiatsh e tahtapipun atshupilu ne ilnussi Mashteuiatsh usham nite utenu uhpime ka takuatsh St-Prime mahk St-Edwidge. Nutshish______ume ishpishau ilnussi.
  | 
