|
Nakila ka tutakanitsh mahk aihtun
Mishue e pampitshitatau tashep apatshitapantsh tshekualu nakila man ka aitutau aihtunilu miam ne tshilanu tshitaihtunnu. Mishue eshpishalitsh e aitutetau natuhussitsh ekute nite katshi alu tshishkutamatishuihk tshitaihtunnu. Mishta mihtshen nite nuhtshimitsh nakila man ka eshilniuihk miam ne e natuhunanuatsh.
Miam ne e nantuapamakant mashk issishuetau. Nekana tshitanashkutapan mushuminuatsh takunilipan tan man katshi aitutau kie e tapuhtatishutau e nantupamatau mashk tshetshi nipahatau. Miam e ka natuhut e natshishkuat mashkua, nashkumeu tshishe manitu (le créateur) katshi milikut tshetshi natshishkuat nite u meshkinamitsh nelu mashkua. Tshisselimeu tshishe manitu nite ka alat nelu mashkua tshetshi napihat tshetshi ashimat utuassim. Katshi napihat ekue minuatsh nashkimat Tshishe Manitu e apatshat tshishtemau ekue alat nite apishish ussunitsh mashk. Katshi kassini tshishkua aihtit ekue pukutshenat.
E ishpitelimatau ne aueshisha uehtsh aihtutau Pekuakamiulnuatsh. Ne mashkuian kanauelimakanu ekune uiash mitshunanun kie ne mashkupimi kanauelitakanu tshetshi mishue itapatshitakanitsh kie ne ushkan atussikaman tshika itapatshitakanu. Ekune ushtukuan mahk ne ushkan eka ka apatshitakanikau mishtukuatsh akutakanu tshetshi nashkumakant kie tshetshi nukutakanitsh e ishpitelimakant ne aueshish. Kie passe ishishueutsh ne uehtsh akutakanitsh ushkan tshetshi uapatikau kutakatsh ilnuatsh nite pimuhtetau e tshi milupalinanuatsh e natuhunanuatsh nite.
  | 
