|
Pahpeikutenu
Eshpish papelik 21e mitashu mitelineu pipun, kie tshilanu tshi uauishiuanu eshi mashituepalitakanitsh ne shipi. Tshetshi petananu nite tshi tshisselitamunnu kie ne eshi nishtunamuhk nite nuhtshimiuassitsh ashitsh nitshe mamu ka atusseshtakau namissiushkuteu Pekuakami ilnuatsh Mashituepalitaun ka ishinikatetsh kie ashitsh nitshe Hydro-Québec. Ekuan ne 2003 pipun, Pekuakamiulnu Tshishe Utshimau mashinatihutishupan nishtutatishunilu nelu ka ishinikatelitsh MANITUKAPATAKAN eku mahk 2004 pipun, ekuan ka tshitshipilitakanitsh atusseun nimisseu ishkuteushuap e tutakanitsh nete Péribonka IV, nete pessish ka lishtutitsh Pelipuhkau shipi mahk (Manuan) shipi.
Muku mishkueka tshitshipalinanuatsh e atussanuatsh e ui ushkutamitshanuatsh, nitshe ka pukunehakau assilu ka nantuapatakau tshiash ilnu utapatshitaun tshi petsh uauitshiueutsh tshetshi milu kanauelitakanitsh ilnu u uelutshiun. Pekuakamiulnuatsh tepantsh nite ka nantuapatakanilitsh kie uiluau tshi munahitsheutsh kie tshi mishkamuatsh tapue shash mishta mihtshetu mitashu mitelneu pipunna espish taik nite laleu mashta shipits.
Nitshe tshi milakanuatsh ka mishta tshishkutamatsheutshuap Shikutimits tshetshi nantuapatshitshanuatsh nete Pelipuhkau ne tshetshi nikanapishtak M. Jean-François Moreau eku mahk aiapishish ka eshi kamishkakau tshi issishueutsh shash ne 1250 pipun uhtanatsh katshi tatau nete ilnuatsh, mishta milekash ne mishkueka natshishkukuatsh ka uapishitau. 16 (kutelnu ashu kutuass) itashipantsh uentshe, eku patetass (5) Pekuakamiulnuatsh tepantsh kie nite. Tshi mishkuakanu akleshau mahk mishtekushiu ashiniu passikan, kie neu (4) katshi kutuanuatsh nite e tshi akuetushtetsh nite katshi manikashunanuatsh. Nish (2) matakan katshi tanuatsh ishpish punipalitsh XVIIIe mitashu mitelineu pipun luash ka tshitshipalitsh uhtanatsh XIXe mitashu mitelneu pipun.
2004 pipun, katshi nashtutatishunanuatsh ashitsh Hydro-Québec tshetshi tshimitakanitsh nimissiu ushkatam, auassitsh nite ka tshishkutamuakanitau Kassinu Mamu tshi ueueshitauts tshetshi mahapukutau nelu shipilu tshetshi thissitatuakanitau ueshkatsh Pekuakamiulnuatsh nite tshe tshipuatsh ne tutakanitsh ushkatam. Apu nita tshikuatsh untshessitau nelu auassitsh ka mahapukutau ashitsh nelu ka tshimatau ka mishta neshtuapatamilitsh nelu shipi mahk e uapatalikutau eshi nashtunamilitsh nelu assilu.
2005 pipun, ne tshe eshi lassipetsh ekuan tshe shakassinetsh ne ushkatam nete Peliphukau, passe ka mishkutapishtuatau peikutenu nite ka takunilitsh u natuhussiuau tshi ituteutsh nete tshetshi mashtel atamishkukau (adieu) ne tshe lassipetsh assi.
Mihtshet tshi tipatshimuatsh katshi aitutau mahk kutakatsh tshi maushukuneutsh ashinilu tshetshi peshuatau ute Mashteuiatsh. Tshi shtimauelimakanutsh mashtel mishtukuatsh, shipi mahk utshi tshi aimituakanuatsh kie tshi nikamutatuakanuatsh.
| 
